ဧည့်မှတ်တမ်း။
သစ်ဆိုးပင်
သစ်ဆိုးပင်(လင်္ကာဒီပ)
နွေဆိုလည်း နွေမို့လို့ပါ
ဆောင်းမှာဆိုလည်းတမျိုး
မိုးမှာဆိုလည်းတဖုံ
ရာသီစုံ ထိတ်လန့်ရခြင်းနဲ့
ငြိမ်းချမ်းမဲ့ဘဝတွေ
ပြေးနေရတာလည်း မောလှပြီ
ဒီမဟာရူး ဘုရင်ရူးတွေကြောင့်ပေါ့။
စစ်အာဏာရှင် သစ်ဆိုးပင်ကြမ်း
မှောင်ခန်းလက်မည်း ဖုတ်ငရဲကို
ဖြိုမလို့အသိ မထိတထိနဲ့
သတိလက်လွတ် ဒေါသလွှတ်ကာ
စိတ်နာရုံလေး နာကျည်းတွေးမျိုး
တခက်ချိုး နှစ်ခက်ချိုး
တချက်ထိုး နှစ်ချက်ခုတ်ရုံကွယ်
ရှင်လွယ်ပင်ဆိုး စနစ်ဆိုးအား
ပျောက်သွားဘယ်လို ချေမှုန်းနိုင်မှာတုန်း။
ငါယုံတယ် မင်းကို
ပျိုရွယ်စိုနစ်ခဲ့
ထက်မြက်တဲ့ ဥာဏ်စွမ်းအား
ခွန်အားအသီးအပွင့်များမှာ
ရဲရင့်ကာ အလှည့်ကျ
ကနွဲ့ကလျ ရှောင်မပြေးဘူးဆိုတာတွေ။
ပူးပေါင်းဆောင်ရွက်မှု
ဂရုပြုအလေးထားစရာ
တာဝန်နဲ့ ဝတ္တရား
ခွဲခြားမြင်နိုင်တဲ့ အမှားအမှန်သဘော
စစ်ကြောသုံးသပ်တဲ့ စွမ်းရည်စစ်
မျိုးဆက်သစ်တို့ရေ…..
အခြေအနေဆိုးကောင်းလှိုင်းဂယက်
မင်းရဲ့လက်ထဲမှာ
တို့အနာဂတ်တွေ ရှိတယ်ဆိုတာ မမေ့လေနဲ့။
ဘုံရန်သူ ဗဟိုယူကာ
ရှင်သန်ရာ ရေသောက်မြစ်မကျန်
ထုတ်ပစ်ရန် တူးဖော်ကာ
လှဲကာဖြိုချရမှာမို့
ဝိုင်းကြပါလှည့် ညီညွှတ်စွာရယ်
ပတ်လည်တဝိုက် စက်စွယ်စိုက်ရစ်
အမြစ်မှကလော် ညာသံခေါ်လို့
ငါတို့ စုပေါင်းတွန်းလှန်လှဲဖြိုချကြပါစို့။ ။
ဧပြီလ ၂၁ရက်၊ ၂၀၁၁ခုနှစ်
စိတ်ကူးလေးရွက်လွှင့်
စိတ်ကူးလေးရွက်လွှင့်
(လင်္ကာဒီပ)
အရှိန်အဟုန်မြန်မြန်
သာမန်မဟုတ်တဲ့နှုန်းတွေ
လောဘတွေစီးဝင်နေသလားထင်။
သူ့အရင်ငါ..........
ဒေါသတကြီး၊
မောဟကြီး
လောဘကြီး
တစီးပြီး တစီးသာ၊ ကျော်တက်ကာသွားကြတယ်
တကယ်တော့ငါ့ကား
နှေးများနှေးနေသလားပေါ့။
ပေါင်းဖက်သွား စုံတွဲချစ်သူ
တူအရွယ် ညီအရွယ်
လူငယ်တွေ ပျိုရွယ်တွေ
အခြေအနေမြန်လှတဲ့ကမ္ဘာထဲ
အသည်းလွှာအချစ်တွေကြီး
တယောက်ပြီးတယောက်သာ
နောက်ချန်ကာ ကျော်ဖြတ်သွားကြတယ်
တကယ်တော့ငါများ
ချစ်များ မချစ်တတ်သလားပေါ့။
သာမန်မဟုတ်တဲ့အဖြစ်သနစ်
အချစ်ကိုဦးစားပေးကြ
အမြန်ကိုဦးစားပေးကြတယ်
ဘီလူးစွယ်တွေကလည်းဖွေးလို့ပေါ့။
ဆန္ဒတွေပြင်းပြင်း
ခံတွင်းအချဉ်ဖြစ်လာ
ဒုက္ခမှာခါးသီး
ဇွဲကြီးကြီးနဲ့တွန်းလှန်
တနိုင်ငံပြီးတနိုင်ငံ
တော်လှန်ပေါင်းစုကာ
အာဏာရှင်ကိုဖြိုချခဲ့တယ်။
တကယ်တော့ ငါတို့များခုထိ
မြတ်အသိ၊ မုဒိတာပွား
တိုင်းရင်းသား မသင့်မြတ်နိုင်သလားပေါ့။
လောဘဂတိ
မောဟဂတိ
အစွန်းသတိတွေထားရင်း
မတူညီချင်းကိုလေ့လာ
“နေ့မှာဆို “နေ” ကလင်း
ညခင်းညဦး “လ” ကဖြူဖွေး”
ဘဦးကြီးမူလေးချက်ကိုဘဲ စွဲမြဲဆုတ်ကိုင်ရင်း
တလှမ်းချင်း
ငါသာလျောက်လာခဲ့တယ်။
သူ့နှုန်း
သူ့အထာ
သူ့အထွာ
သူ့အတိုင်း
စည်းကမ်းအတိုင်း
မူအတိုင်းသာ
ငါဟာရွေ့လျားလာခဲ့ ခရီးအဝေး
တော်လှန်ရေးပန်းတိုင် အသက်အငွေ့
“တနေ့တလံ၊ ရသေ့ပျံ” ရယ် .........
ဘယ်ပြေးမလည်းပေါ့နော်။ ။
(လင်္ကာဒီပ)
ဧပြီလ ၁၃၊ ၂၀၁၁
Subscribe to:
Posts (Atom)